مساء الخير هالمره بلاش آسف على التأخير

مساء الخير هالمره بلاش آسف على التأخير
مدام الرد بعيونك دموع فكل تأخيره

ثقل دم العذر ، والا كسح وجه الخطا تبرير
مدامك عارفه طبعي أجل وشوله الحيره


ترى ماجيت لجل اسمع سواليفك عن التقصير
أعرف ان الخطا مني ( بلاش نعيد هالسيره )


انا وانتي بهالدنيا تحملنا بعضنا كثير
تعوّدتي على عنادي ، وصرت آحب هالغيره


انا وانتي حكايتنا مثل صدر السما والطير
كثير اللي يطالعها ،، ولحدٍ طالها غيره


انا وانتي حكايتنا مثل لعبه ، وطفل صغير
مع انه دوم يهملها رفض يسمح بها لغيره


انا وانتي وش اوصفلك عجز عن وصفنا تعبير!
مثل ! مدري ! مثل وشو ! ولكن صعب تصويره


انا وانتي بلاش انتي أنا لو بفقدك شيصير
عليم الله لو ما انتي فلا طبيت هالديره


أحبك ايه أحبك ذي بعد يبغالها تفكير
يخلف الله على عقلٍ ملكتي كل تفكيره !!


تعالي نحترم ( شيبة غلانا ) لعنبو التصوير!!
تعالي نغتنم فرصة لقانا دامها قصييره


ومساء اللي تبين انتي على قولك ( صباح الخير )
أنا كل يوم بتأخر اذا في دمعتك خيره